Lionel Mesi do të zyrtarizohet këto ditë si futbollisti më i ri i klubit të Inter Majemi. Argjentinasi braktisi Europën për të nisur një aventurë të re përtej Atlantikut, me planin për t’iu larguar sadopak bujës dhe trysnisë që e ka shoqëruar gjatë gjithë karrierës.
Dhe duket se deri diku ka pasur të drejtë pasi në fotot e publikuara së fundmi në rrjetet sociale, duket se në Amerikë ai ka gjetur mundësinë që të bëjë sadopak jetën normale që i ka munguar atij dhe familjes.
Ylli argjentinas është shfaqur papritur në një supermarket në Majemi bashkë me gruan dhe fëmijët, duke bërë shoping për jetën në SHBA.
Ai është njohur nga disa të pranishëm që kanë bërë foto me të, por edhe ka bërë blerjet vetë duke pritur radhën te kasa, pa pasur nevojë që të rrethohej nga shumë truproja siç ndodhte zakonisht në Europë.
